الخفقان أو الرفرفة
الإحساس المزعج بضربات القلب — إمتى يكون سببه كهربية القلب، وإمتى يكون سببه حاجة تانية خالص زي الأنيميا أو الغدة أو الكافيين.
خفقان القلب هو الإحساس المزعج بضربات القلب، سواء كانت الضربات أسرع أو أبطأ من الطبيعي، أو كانت قوتها أو انتظامها مختلفين عن المعتاد.
مجرد فقدان الانتظام الكامل في ضربات القلب ممكن يسبب إحساس بالخفقان، زي ما بيحصل في حالات زي الرجفان الأذيني أو الضربات الزائدة (المبكرة) وغير المنتظمة للقلب.
في بعض الحالات، سرعة ضربات القلب بتكون نتيجة مشكلة في كهربية القلب، ودي ممكن تحتاج لعلاج دوائي، وفي بعض الحالات قد تحتاج لإجراء متخصص لعلاج اضطراب ضربات القلب، زي الكي بالقسطرة أو الـ Ablation.
لكن في حالات تانية، سرعة ضربات القلب بتكون بسبب عوامل خارجية ومش مرتبطة بمرض في القلب نفسه. ومن الأسباب دي زيادة نشاط الغدة الدرقية، أو الأنيميا، أو حتى القلق والتوتر، وكمان الإفراط في تناول الكافيين.
تشخيص خفقان القلب بيحتاج تقييم طبي سليم، يشمل الكشف الإكلينيكي وعمل رسم قلب، وفي بعض الحالات ممكن نحتاج لجهاز هولتر لمتابعة وتسجيل ضربات القلب لفترة أطول.
ولو كان اضطراب ضربات القلب معقّد أو متكرر، فالأفضل إن المريض يتقيّم عند طبيب متخصص في كهروفسيولوجية القلب واضطرابات نظم القلب، لأنه الأكثر تخصصًا في الحالات دي وبيقدر يقدّم خيارات متقدمة للتشخيص والعلاج.