حكاية الثقب الأذيني
إيه هو الثقب الأذيني (ASD)، إمتى بيحتاج علاج وإمتى بيقفل لوحده، وإيه المطلوب من الأب والأم.
القلب الطبيعي بيتكون من أربع حجرات، وفيه جدار بيفصل بين الناحية اليمين والناحية الشمال. أحياناً الطفل بيتولد وفي الجدار ده فتحة، ودي اسمها ASD أو ثقب الحاجز الأذيني. ولأن ضغط الدم في الناحية الشمال دايماً أعلى، فجزء من الدم بيعدّي من الشمال لليمين خلال الثقب بدل ما يمشي في مساره الطبيعي علشان يغذي أعضاء الجسم المختلفة.
وبسبب الدم اللي بيتسرب من الناحية الشمال, الناحية اليمين من القلب والرئة بييجيلهم دم زيادة عن الطبيعي. ومع الوقت، ده ممكن يسبب للطفل مشاكل زي الكحة المتكررة، والتهابات الشعب الهوائية، وكمان ممكن يتعب بسرعة لما يجري أو يلعب، وأحياناً لو الثقب كبير, ممكن يأثر على نمو الطفل.
المشكلة مش بس في الأعراض دي؛ لأن لو الفتحة كبيرة واتسابت من غير علاج لفترة طويلة، ممكن تعمل ارتفاع في ضغط الدم في شرايين الرئة، ومع مرور السنين ممكن توصل لضعف في عضلة القلب. للأسف لو وصلنا للمرحلة دي, بيكون العلاج صعب جداً.
طيب، هل كل طفل عنده فتحة لازم يعمل عملية؟
الإجابة لأ.
الدكتور بيقيم حجم الفتحة وتأثيرها على القلب وعلى صحة ونشاط الطفل. لو الفتحة صغيرة، في حالات كتير ممكن تتعالج بدون أي تدخل. أما لو الفتحة متوسطة أو كبيرة، في الغالب هنحتاج نقفلها. وبرضه مش دايمًا بنستعجل، لأن بعض الفتحات ممكن تصغر أو تقفل لوحدها خلال أول كام سنة من عمر الطفل.
ولو الطفل وصل حوالي أربع أو خمس سنين ولسه الفتحة كبيرة ومحتاجة تتقفل، ساعتها بنحدد أنسب طريقة للعلاج. ممكن تتقفل عن طريق القسطرة، وممكن تحتاج جراحة قلب، وده بيتحدد بعد فحوصات متخصصة، أهمها الإيكو على القلب.
يعني أنا كأب أو أم, إيه مطلوب مني لو طفلي عنده ثقب أذيني؟
متقلقش, طفلك هيكبر ويعيش حياة طبيعية بإذن الله. كتير من الثقوب حجمها صغير, مش بيأثر على الطفل وممكن يقفل لوحده. ولو الثقب كبير, العلاج سهل ومتوفر الحمد لله.